陳健安 日前為新歌《課題分離》拍MV，為配合歌詞內容，導演安排十多人飾演唔同角色，連 Nowhere Boys 成員 Van 嘅狗仔Poochie都客串一角，各人不論喺商場、街道、天橋、碼頭、隧道到街市，不斷重複出現喺安仔身邊指摘同騷擾佢，而安仔就處之泰然，彈住結他自得其樂，態度反差極大。
《課題分離》係安仔今年第二首派台歌，由佢本人作曲、Oscar填詞、賴映彤編曲兼與安仔一同監製。安仔表示歌名沿自𠵍學家阿爾弗雷德·阿德勒（Alfred Adler）心理學核心思想嘅「課題分離」 。佢話：「人際關係嘅紛爭，好多時源於干涉其他人嘅課題，又或者被別人干涉自己嘅課題。我而家呢個階段要學習分清楚事件係自己定係人哋嘅課題，有冇過份干涉別人嘅課題呢？有啲人分唔清，甚至被情緒勒索而內耗。」
安仔仲話其實旋律早於2017年已寫好，事隔9年終於曝光：「每次做新project，我都會攞晒 啲Demo出嚟重新聽，原本呢個Demo唔係呢個感覺，攞出嚟聽發現『幾啱feel喎』，然後我重新改咗啲編曲，配上呢個好似好認真嘅題材。曲風好chill、好輕鬆，但內容好認真，產生化學作用。」
而MV導演，除身兼填詞人嘅Oscar外，仲有安仔足球隊拍檔Yatho一同執導。安仔話：「佢哋搵咗好多角色人物去煩我、滋擾我，佢哋好專業咁鬧我、騷擾我，辛苦佢哋走好多個場景，每次都要做相同嘅動作，然後剪接，呈現今次MV和主題。」
安仔上首作品《梨子》講述父子關係，今次《課題分離》就探討人際關係，佢話：「每個人因為原生家庭而有好多課題，點樣好好地同親人溝通？透過呢首歌同大分享，唔好框死在一個角色。」