63歲嘅功夫巨星 李連杰 日前喺洛杉磯舉行嘅第五屆Gold Gala亞太裔精英峰會上，獲頒「金傳奇終身成就獎」（Gold Legend獎），李連杰更同兩位千金Jane同Jade一齊亮相呢個國際舞台，之後仲喺社交平台分享感受。
佢表示好感恩得到大家對佢成就嘅高度肯定，特別係佢淡出公眾視線嘅呢幾年，得知唔同年齡層嘅人，都受到佢啟發而去追夢，令佢非常感動。李連杰又話可以同李小龍女兒Shannon以及自己女兒Jane同台，感覺非常特別。
喺活動上，李連杰更重遇昔日一齊拍《浴血任務》嘅拍檔Terry Crews，兩人一見面就熱情互動。
而喺超級英雄電影飾演「尚氣」嘅加拿大華裔演員劉思慕，一直都視李連杰為偶像，佢更喺社交平台分享同偶像嘅合照，佢仲讚揚李連杰改變咗世界，將中國武術帶到全球舞台，仲話李連杰係亞洲人嘅驕傲。
