阿嬌 鍾欣潼 多年嚟都因為逆天神顏而有「女媧畢業作」嘅美譽，即使阿嬌嘅身材時肥時瘦，但美貌仍係網民一致公認「肥過瘦過但冇醜過」。仲有人不時講笑，指阿嬌嘅肥並非認真，想瘦嘅時候一定瘦到，亦好奇佢究竟點做到肥瘦飄忽。
最近阿嬌就以「不被身材定義，享受在自己的節奏裡」做題材，拍片喺社交平台同細談身材問題。阿嬌表示，以前減肥方式唔健康，所以而家自己唔追求咩都唔食嘅節食法，亦唔追求放縱食，因為食完就會後悔。
反而會認清楚自己係「想要」定係「需要」，阿嬌仲同大家分享佢嘅餐單，包括蔬菜、肉類、雞蛋及少量主食，佢強調每餐都要食得滿足並且唔後悔，更分享金句口訣：「不是吃得少，是吃得穩。」
阿嬌坦言身材管理對佢好重要，認為最重要係生活規律，而喺運動方面，佢表示自己唔會追求強烈運動，會喺力所能及嘅範圍做，包括飯前行一行、睡前拉伸一陣。
阿嬌仲分享對身材邊界感睇法：「我想輕盈，但我更想舒服。我可以認真，但不把自己逼到極端。能享受生活，也能把自己照顧好，這才是我想要的狀態。」呢個心態都得到唔少粉絲大讚。