周奕瑋 主持嘅全新節目《周遊人生》將會喺下星期一播出，呢日記者會請到阿Jar嘅好朋友 黎芷珊 做主持，以訪問嘅形式為大家介紹節目內容。阿Jar對芷珊嘅現身特別感動，亦覺得好榮幸對方做主持。阿Jar指自己好鍾意芷珊嘅《最佳》同埋《芷珊約你》系列，不過自己未有機會做嘉賓，所以好開心可以以呢個模式做記者會。
芷珊為咗保持神秘感，更特別缺席阿Jar喺上星期舉行嘅試映會，點知呢日到現場先知，原來阿Jar已經得知佢會嚟，令佢都覺得有少少功虧一簣。
今次《周遊人生》嘅故事主人公全部都係素人，拍攝同訪問內容有好多都冇得事先預期，不過阿Jar嘅表現就連做人物專訪經驗豐富嘅芷珊都大讚。芷珊話做素人專訪難度比做藝人專訪大，因為觀眾睇明星專訪都會揀人物或內容去睇，而阿Jar呢次以全素人方式去做，真係好夠膽，亦可以令觀眾見到佢已經大個仔。
阿Jar都承認，呢個節目完全係重過難度挑戰嘅攞膽之作，笑言係動用全公司人力物力俾觀眾知佢已經大個仔，自己已經拎定「最佳男主持」嘅獎喺背後，有咩事都可以即刻還返個獎俾公司。
《周遊人生》5月18號起 星期一至五晚 22:30 翡翠台