選秀節目《魔音女團》賽情去到一半有多，喺16位練習生當中，先前被叮走嘅8位經過12小時極速改造後再戰舞台，接受重考挑戰後，成績突飛猛進嘅四位包括莊子璇、蔡華英、廖慧儀同喬美莎，最終成功攞返自己個名牌歸隊。
面對戰友止步嘅場面，一班女仔都好激動，好唔捨得，尤其係莊子璇仲忍唔住大喊，佢話自己好唔鐘意分開嘅感覺。
重考挑戰進行其間，睇見8位女仔竭力應付舞台，令台下觀戰嘅練習生心情都去到頂點，成功入圍嘅倪嘉雯，就話如果佢真係要參加復活戰，佢肯定輸梗，而邢慧敏亦都覺得如果Team A Team B要揀四個人出局，自己一定榜上有名，佢仲爆陳奐仁同佢講，「坐順風車嘅人，麻煩嚟緊好好努力啊﹗」
當聽到隊友李尹嫣被foul出局時，蔡華英即忍唔住爆喊，仲喊得犀利過出局嗰幾位呀，被foul嘅李尹嫣感觸表示，「本來大家講話想一齊去到最好，我覺得我會好唔捨得啲訓練，因為我真係好鐘意，所以我係好期待呢個月嘅訓練，咁而家就自己訓練。」
《魔音女團》星期一至五晚 22:30 翡翠台