李家鼎前妻施明離世後，大孖李泳漢同細孖李泳豪傳出爭產風波，泳漢兩公婆被揭攤大手板向老竇苛索金錢無度惹起全城公憤。鼎爺傷心欲絕消瘦得令人擔心，豪仔經歷傷痛後收拾心情復工，喺呢段時間好感謝各界關心同慰問，尤其喺《愛‧回家》大家庭，豪仔喺事件後首度現身《TVB娛樂新聞台》回應不實指控及交代鼎爺現況。
豪仔指爸爸鼎爺之前冇胃口食嘢，而家重拾食慾，身體明顯長肉，變回對食有要求。豪仔有同鼎爺講TVB同事及全港市民都擔心佢、關心佢健康，豪仔話鼎爺已做身體檢查，只係營養不足。
經歷施明離世後，鼎爺公開委託豪仔做執行人接管佢嘅資產，豪仔亦肩負照顧家人嘅責任，坦承呢個係鼎爺意願，佢感激爸爸嘅信任。豪仔話近年習慣處理鼎爺生活及工作事宜，而鼎爺今次舉動係想避免將來有任何爭拗出現。豪仔話鼎爺年事已高，自己會肩負照顧責任，自己嘅工作可以應付家庭生活，因為鼎爺平日開支唔多，兩父子外出食飯又冇特別要求。
豪仔太太Agnes出席施明喪禮時，人同花牌均被拒諸門外，聞者心酸，之後泳漢又流出一段經過刪剪嘅錄音，公開指責Agnes同鼎爺涉及金錢嘅話題，豪仔不忍老婆受辱，再度提起此事，豪仔繼續貼心護妻，唔想老婆受不實指控影響。對於哥哥李泳漢嘅事，豪仔不欲多談。
媽媽施明離世，待母至孝嘅豪仔難以撫平傷痛，喺喪禮上送別媽媽後，如今最想知亡母將會安葬喺邊，佢好感激大家私訊，可以透過咩途經尋找安葬地點，亦嘗試聯絡哥哥泳漢查詢。