郭富城太太方媛（Moka）最近參與一個內地綜藝節目《五十公里桃花塢》，噚晚首播估唔到第一集因「房間分配」問題，天王嫂方媛堅持要住單人房，導致另外9個男藝人必須共用一個廁所，引起內地網民批評，方媛凌晨打破沉默，喺社交平台貼長文反擊，卻被唔少網民留言圍攻，方媛後嚟火速刪走帖文。
方媛喺社交平台分享佢同阿女嘅故事，直言從細被教育要「孔融讓梨」，但佢而家想教女兒一件事，「善良，不必委屈自己；懂事，也不必勉強硬撐」，方媛強調女孩子「配得感」唔係靠退讓去換取，唔希望小朋友為咗迎合別人而將就自己。翻查網上資料顯示「配得感高」係指一個人從心底裡「相信自己值得擁有美好事物」嘅主觀感受，唔覺得心虛，並勇於爭取自己應得嘅機會。
查實方媛喺節目裡面解釋堅持單人房理由好單純，係因為佢作息晚，唔希望打擾室友，而該單人房間本來係男生嗰邊，男參加者一開始係照顧女參加者讓出嚟，後來睇房間時發現若果單人房畀女參加者住，男參加者9個人只能用一個洗手間，徐志勝只好跟方媛解釋情況，客氣講「單人間還是給男生比較好」，方媛仍堅持瞓單人房，被網民批評只考慮自己，方媛此舉喺節目播出後立刻衝上內地網熱搜榜，各界對於佢做法褒貶不一。
方媛喺節目出街後，分享「配得感」長文為自己辯護，強調女性唔應該過度退讓，「不必委屈自己，女孩子的配得感，不是靠退讓換來的」。方媛認為呢個唔係耍大牌，而係遵從內心感受嘅權利，同時指出所有參與節目錄製嘅工作人員都相當辛苦，理應享有更完善休息環境。
方媛更直接tag節目官方帳號，「我們值得充足的房間和衛生間配置 對吧^_^」，要求改善住宿條件，卻被網民解讀為直指節目組房源安排不足，係害男藝人冇廁所用嘅元兇，但方媛發佈貼文不久隨即被刪除，再次引起網民熱議，網友直言此事跟女性權益無關，純粹係個人選擇，另有網民質疑其處事態度，亦有網民指出，對自己好跟自私係兩回事，覺得唔應該混為一談。
