曾主持TVB兒童節目《放學ICU》、陪伴無數小朋友成長嘅「家聰哥哥」劉家聰，近日現身《流行都市》分享抗癌心路歷程。現年48歲嘅佢，透露8年前跑山時因無故失平衡、走路偏向一邊而求醫，先發現左腦有一個直徑6厘米嘅巨瘤。
myTV SUPER重溫《流行都市》精彩內容
家聰指開腦手術過後，真正嘅考驗先正式開始，因為手術後要面對嚴重嘅後遺症，包括視力模糊、口齒不清，甚至一度半身不遂，佢要好似小朋友咁重新學行路、說話等，無疑對以前經常擔任司儀工作嘅佢係重大打擊，而為咗克服「黐脷筋」，家聰經常拎住講稿嚟苦練發音。
家聰感性表示，幸好當時有愛女一直支撐住自己，令佢知道唔係獨自抗癌，佢仲話一定要親眼睇住囡囡大學畢業。
大病過後，家聰坦言自己嘅脾氣有所改變，學識放慢腳步細味每樣事物。而為咗調理好身體，家聰更利用工餘時間進修中醫，希望以過來人身份，運用中醫知識「助己助人」。
佢又指因為自己曾經歷過絕望，所以理解到病人喺面對生死時嘅恐懼，佢以自身經歷勉勵正受病痛折磨嘅病友，希望大家唔好放棄，咬緊牙關撐過去。
