三哥苗僑偉、岑麗香ElizaSam主演嘅劇集《重案解密》播出後掀起話題，劇中不同嘅個案由眾多演員去演繹，見到一啲唔常喺螢光幕上出現嘅藝員，其中何佩瑜（Jeana）飾演嘅「綁匪」， 將親生骨肉當提款機，親手綁架自己女兒，為咗掩人耳目仲要將阿女塞入行李箱，Jeana演得七情上面。
Jeana拍攝時有經過內心掙扎，因為佢本身好鍾意小朋友，加上自己嘅細佬都係由佢一手湊大，所以演呢幕戲最內疚嘅係要塞阿女入行李箱，憶起拍攝當時完全起晒雞皮，仲反問點解媽媽可以餵個女食藥，然後放入篋咁殘忍，雖然呢幾個動作好簡單，就最令人心寒。當時導演要求Jeana用兩個方式演繹，一個係狠心、另一個係心情有啲猶豫嘅版本。Jeana笑指無論邊個版本都好，只希望BB第日睇番呢個鏡頭唔會留下心理陰影。
Jeana呢集除咗同梁烈唯合作，當然唔少得飾演探員嘅三哥同香香有對手，當日喺大街小巷拍攝時，吸引好多巿民圍觀，Jeana大讚三哥呢位前輩氣場震懾，又對演員們好Nice，大家好快打成一片，拍攝好開心。
