資深電影人 谷薇麗Linda 於5月初離世，終年73歲，其家屬於5月14號為Linda設靈。Linda早喺八、九十年代，香港電影黃金時期活躍影圈，佢經手監製同策劃嘅經典作品有《秋天的童話》同《縱橫四海》等等，同眾多巨星合作無間，對影壇貢獻良多。Linda喺圈中人緣好好，靈堂內外都佈滿花海，周潤發、周星馳、梁朝偉、劉嘉玲、張艾嘉、張學友夫婦、洪金寶、梁家輝、盧冠廷夫婦、岑建勳等都有送上花牌悼念。
痛失家姐嘅 谷德昭 與女友 林子萱Kiki、姪女 谷祖琳 提早到靈堂打點，近年需用拐杖借力步行嘅谷德昭由女友攙扶步入靈堂。
昔日好友 鍾楚紅 抵達靈堂時，忍唔住喊得雙眼通紅，難掩悲痛。另外，Linda生前嘅一眾好友曾志偉，毛舜筠、陳可辛、吳君如、劉偉強、施南生、田啟文等亦都陸續抵達靈堂送別好友。
翌日家人就為Linda舉行天主教大殮儀式，Linda嘅一對仔女、胞弟谷德昭同女友亦一早到達，Linda嘅丈夫就一直於場外，向一眾親友握手及擁抱致意。儀式結束後，工作人員將Linda嘅靈柩送上靈車，而Linda嘅兒子就手持媽媽遺照同妹妹一齊登上靈車。再次嚟送別Linda嘅紅姑，離開時亦難掩傷感，而Linda嘅姪女谷祖琳就同女兒一齊步出教堂。
