張繼聰 最近跨界挑戰新領域，首度擔任舞台劇監製，呢日佢聯同 廖子妤 何嘉莉 吳冰 黃梓僑 湯君慈 及 朱栢謙 等出席記招，古天樂預先拍片鼓勵大家。
作為P牌監製嘅阿聰，未有感到太大壓力，自己唯一報答古老闆係唔蝕錢，最緊要係開支要計數，加上台前幕後係好信得過嘅班底，所有錢都用得其所。
阿聰話搵演員都係一項挑戰，打電話後要等回覆，再問吓演員覺得劇本點呀，如果唔做，又要有plan b，呢啲都係望天打卦，阿聰好開心一班兄弟姊妹一齊去努力。阿聰呢次冇搵太太謝安琪參演，佢話太太有另一個更重要崗位，就係幫佢分心減壓，返屋企見到太太好靚、好正，自己就飾演「昏君」角色，等自己暫時放低工作，盡情陪仔女開心去玩囉。
朱栢謙呢次兼任導演，同廖子妤及何嘉莉飾演一家人，有兩位靚女做老婆，朱栢謙享盡艷福，佢都好期待喺舞台上同兩位靚女合作，朱栢謙笑指何嘉莉係佢個年代嘅女神，望住對方有少少怕醜。
