已故「賭王」何鴻燊二房千金 何超蕸 上月因病離世，享年58歲。由政商及演藝界組成嘅「何超蕸女士追思委員會」，5月17號喺香港一間酒店宴會大禮堂為超蕸舉行追思會，供團體致祭、私人追悼及公眾致祭，禮堂外佈滿花海。
家屬同嚟自各界嘅朋友，早上9點起陸續到場，超蕸嘅家姐何超瓊、何超雄、行動不便嘅何超儀手持拐杖，同老公陳子聰以及私人醫生Iman到場。何猷龍、何太陳婉珍同女兒何超蓮、何猷啟、何超雲同男友亦罕有同框亮相。
何太梁安琪同何猷亨、何猷君同太太奚夢瑤、何超盈一家三口、黎芷珊、翁嘉穗、蔡加讚同蔡加怡、岑潔儀、霍震霆、霍啟山、霍啟剛同太太郭晶晶、楊千嬅同老公丁子高、趙式芝、財政司司長陳茂波、葉劉淑儀、容海恩、陳家珮、盛智文等等。
追思會結束後，超儀離開時接受傳媒訪問，佢表示對家姐超蕸離世，全家人都感到好震撼，又澄清超蕸非乳癌離世，更指家姐「周身都有癌唯獨就係無乳癌」。超儀亦提及昔日讀書時同超蕸相處嘅難忘時光：「我成日都被學校罰，喺呢個時間我成日去LA揾佢，佢會對我好好，佢會帶我周圍旅遊同請我食嘢，佢一啲都唔會怪我點解會被學校懲罰，佢大讚超蕸為人好輕鬆、好細心，過時過節邊個要食齋，邊個要咩，佢都全部記得並安排好。」
超儀相信上天想早啲捉走一個對社會有貢獻嘅人，認為可能未來嘅世界已經唔適合一個咁好嘅人住。佢又表示超蕸臨終時，有見到三家姐最後一面，又表示當時超蕸已無法表達，最後超儀相約三家姐下世再續姊妹情。
以好朋友身份嚟參加追思會嘅霍震霆，離場時亦有分享感受，佢話對於超蕸離世感到好突然，佢話之前一齊開會，佢有幾次都缺席，但未有為意，後來就收到壞消息。
霍震霆透露超蕸生前喜歡大自然，所以追思會亦營造成花園嘅氣氛，一班家人摯友喺呢個氣氛下送佢最後一程，佢又大讚超蕸為人及佢對社會嘅貢獻，表揚佢係年青人嘅榜樣。