首度於紅館舉行個唱嘅 方力申 完成兩場演出，雖然第二場演出前不慎扭傷，最後要靠食止痛藥再上陣。小方指原本只係游水放鬆吓，點知事後換褲時就突然「閃到」，仲笑指唔少中年男士都會不時遇到呀。
呢晚小方邀請 楊千嬅 擔任嘉賓一齊合唱，原來佢哋早於25年前已認識，當時小方剛以藝人身份加入歌壇，首次面對現場觀眾，就係為千嬅一個演出擔任嘉賓，非常感激當年嘅機會呀。
而《美女廚房》同《百分百感覺》嘅好友亦連續兩晚上台助陣，一直於台下捧場嘅方太 葉萱 亦聞歌起舞。小方完場後訪問時，就提到當年《百分百感覺》老婆仍只係小朋友，仲指當年係坐爸爸腿上欣賞，又曾與同學交換小方嘅明星卡。而囡囡Isla亦成為全場焦點，小方見到傳媒刊登嘅囡囡相片都覺得非常得意，話阿囡自己除眼鏡俾傳媒影相超搞笑呀。
