周吉佩 上周末於廣州舉行《延續．第三人生》演唱會，與一眾「吉士粉」同觀眾度過感動又熱鬧嘅一晚。吉吉更罕有剖白，落淚自爆曾因得獎後遇到反對聲音而懷疑自己，承受巨大壓力，更影嚮太太與小朋友，又感謝大家近幾年對佢不離不棄，令佢由黑暗走向光明，更兩度向樂迷鞠躬致謝。
身穿一身紫色長褸嘅吉吉以一曲《祝君好》為演唱會揭開序幕，緊接演唱《深愛著你》時，全場樂迷亦一齊和唱，吉吉仲高呼：「終於嚟到廣州喇！由香港去澳門來到今日廣州站，多謝大家陪我去好多地方，呢幾年走過來唔容易，感受到大家嘅愛有增無減。」之後向樂迷鞠躬以示謝意。
吉吉曾以樂隊姿態活動，呢日演唱會上就唱出Beyond歌曲致敬，之後換上紅色閃片西裝大騷胸肌，唱出《找片天空接收我們》同《手機關掉的一刻》等歌曲。有歌迷要求佢再解多一粒鈕，吉吉就笑稱：「已經好低，冇乜嘢睇！再解就露點喇！」。
其後吉吉再換上一身白色服裝，自彈自唱《高山低谷》、《陪著你走》，期間忍唔住感觸落淚：「好叻㗎喇！過去經歴好多，我忍到最後先喊出嚟！」吉吉指《中年好聲音》奪冠後，好多聲音都認為佢唔值得、爆冷。
吉吉話：「到賽後第三日，反對聲音太勁，特別夜䦨人靜時意志好低，會有負面想法。所以，好多謝你哋比力量我，見到你哋咁支持我，點解重要拘泥網上唔識嘅人？好多謝呢幾年你哋對我不離不棄，令我由黑暗走向光明。」
吉吉仲指連家人，包括太太同小朋友都受到影響。佢哽咽話：「我好多謝我太太，知道佢好大壓力，試過我拍節目時打電話比佢，佢連講一句說話都驚比人鬧，我知佢付出咗好多，我會報答佢，今年都買咗好多嘢比佢。我亦要多謝爸爸！死啦！越講越喊。」
吉吉更非常開心終於返到兒時家鄉廣州演出：「今晚廣州嘅鄉親父老都有嚟！我可以大聲咁講，終於有少少出人頭地返到嚟，話比大家知我係歌手。」
到演唱會尾聲，吉吉唱出《第三人生》，又同觀眾齊放紙飛機，期望演唱會盡快飛到下一站，可以喺香港或其他地方同大家再見面。最後Encore環節，佢以《我的親愛》同《無言感激》，加上第二度向樂迷們鞠躬作結。