熊黛林 同郭可盈細佬 郭可頌 結婚十年，並誕下一對雙胞胎囡囡，生活幸福美滿。不過Lynn婚後並無退出幕前工作做全職太太，反而繼續衝刺事業，喺戲劇同直播事業都做得有聲有色。
Lynn最近就喺一個內地真人騷分享，19歲入行時嘅辛酸史，透露當時因為冇工開而被迫著透視裝，一度當場爆喊。所以即使Lynn嫁入豪門做富貴少奶，事業心仍然好強，更因為工作太忙而好少時間留喺香港。
不過Lynn嘅老公郭可頌係十足十「愛妻號」，近日佢化身人肉速遞親自飛到杭州探老婆班，仲大方放閃，表示自己即日即興買機票要俾驚喜老婆，仲話：「勁掛住佢。」毫不掩飾對老婆嘅想念。而到達當地後，郭可頌現身Lynn嘅直播間外，當時Lynn專心同工作人員開會未有發現老公，郭可頌隨即喺鏡頭前對老婆單手比出「心型手勢」，溫柔叫：「老婆。」
Lynn望見老公時表得十分驚喜，更開心甜笑。兩公婆仲有甜蜜互動，Lynn親自為老公化妝，三人真係閃到爆，令唔少網民都話「嫁啱人好重要。」，認為Lynn真係嫁俾愛情，幸福滿瀉。
