一向係阿仙奴鐵粉嘅 袁文傑 日前飛到英國支持愛隊，袁文傑連日嚟都喺社交平台大曬相片及影片，分享睇波之旅嘅點滴。愛隊阿仙奴相隔22年重奪英超冠軍，賽後袁文傑就喺社交平台上傳短片分享興奮心情。
片中可見，身穿阿仙奴球衣嘅佢邊行邊歡呼，同大批球迷一齊到酋長球場慶祝狂歡，沿路佢仲得意忘形到差啲被石壆絆倒，而佢亦寫到「We are Champion 」嘅字句，睇得出袁文傑超級High﹗
之後袁文傑再上載咗一條喺酒吧狂歡以及返酒店休息嘅片段，直言心情難以平復嘅佢話，佢同球迷賽後衝去酋長球場慶祝，更形容現場墟冚嘅場面，比維園年宵仲要厲害100倍，佢仲話自己實在太開心，歡呼到幾乎失聲咁滯呀。
袁文傑呢次除咗見證愛隊阿仙奴奪冠呢個歷史性時刻之外，日前仲到訪酋長球場嘅球員通道，同多位阿仙奴球星握手合照，相信呢次嘅英國之行，帶比袁文傑好多難忘嘅回憶呀﹗
