電視廣播有限公司（TVB）於「2026紐約電視電影節」再度揚威國際，三個主要大獎率先成為今屆焦點：由 TVB CID（Creative Imaging Department）創作嘅《刑偵12》宣傳片勇奪「電視劇宣傳組別金獎」；《2025香港小姐競選決賽》榮獲「製作設計／美術指導組別銅獎」；無綫新聞及資訊部製作嘅《新聞透視：宏福苑五級火》則奪得「時事節目組別銅獎」。
今年踏入第69年歷史、全球廣播及影視創意界享有高度聲譽嘅年度國際盛事於香港時間今日（22日）公布得獎名單，TVB今屆合共勇奪1金、2銅及4個優異獎，充分展現TVB喺劇集、綜藝、新聞專題、品牌宣傳、製作設計及影像創作方面嘅多元實力。
今屆焦點之一係TVB企業傳訊CID 部門先後獲榮獲「電視劇宣傳組別金獎」同「製作設計／美術指導組別銅獎」，以及憑《2025父親節》宣傳片獲得「電視台／形象宣傳片組別優異獎」。其中《2025香港小姐競選決賽》獎項由 CID 與佈景設計科共同取得，彰顯 TVB 幕後創作、視覺美學及跨部門製作協作嘅專業水平。
CID一係 TVB內極具代表嘅創意核心部門，多年來憑藉精準嘅品牌影像策略、高質素宣傳片製作、細膩視覺敘事、成熟美術設計及具辨識度嘅電視美學，喺業界建立穩固口碑，亦深受廣告、影視、媒體及創作界認同。根據近10年資料，CID喺呢10年期間（2017年至2026年），於「紐約電視電影節」合共取得32個獎項，包括4金、5銀、8銅及15個優異獎，成績持續亮眼，足證其創意製作實力及國際競爭力一直備受肯定。
於短影音、串流平台、社交媒體及數碼內容高速增長嘅時代，影像製作正面對更高嘅速度要求、更密集嘅內容需求，以及更強嘅視覺競爭。《刑偵12》宣傳片正係 CID 以創意主導、AI輔助嘅成功例子。團隊喺冇影響原有創作方向及藝術判斷嘅前提下，透過 AI 技術把平面宣傳照延展成具動態感、情緒變化及視覺張力嘅影像，令原本靜態嘅人物照呈現出更立體嘅敘事效果，大幅縮短製作時間，亦有效減省製作成本，令團隊能夠喺更短周期內完成更高密度、更具電影感及更有網絡傳播潛力嘅宣傳內容。
《刑偵12》宣傳片以黑白紫粉紅主調建構懸疑美學，談到《刑偵12》宣傳片設計概念，TVB CID 導演 Patrick 指出，不同角色各有立場，對與錯、黑與白，往往取決於觀眾點去理解，Patrick 續指，劇集其中一個重要元素係解離症，往往與童年時期嘅生理或心理創傷有關，因此宣傳片特別加入多幅被撕碎嘅孩童畫作，象徵破碎記憶與潛藏傷痕；破鏡元素則呼應人格、身份及內心世界嘅分裂狀態。
《2025父親節》宣傳片就係用AI影像生成打造暖心親情故事，以可愛貓咪及 AI 劉丹（丹爺）作為重點概念，透過主人翁、女兒與拾回來嘅貓咪之間嘅關係，展開一段圍繞人性、親情與思念嘅暖心故事。該宣傳片突破位在於善用 AI 影像生成及模型訓練技術，以丹爺外貌作為創作基礎，建構出具熟悉感及情緒連結嘅 AI 角色形象。
TVB多個節目組別獲獎，展現內容製作全面實力，TVB今屆亦喺新聞資訊、劇集及綜藝節目等多個內容範疇獲得國際肯定，充分反映 TVB 作為領先華語電視媒體，於原創內容製作、專業新聞報道、節目策劃、視覺包裝及市場觸覺方面均具備全面而成熟嘅製作實力。
無綫新聞及資訊部今屆勇奪 1銅1優異獎，其中《新聞透視：宏福苑五級火》榮獲「時事節目組別銅獎」，《新聞透視：詐騙園進化》則獲頒「公共事務節目組別優異獎」。兩個獎項充分肯定 TVB 新聞團隊多年來喺公共議題、時事追蹤、深度調查、社會脈搏掌握及專業新聞製作方面嘅實力，亦彰顯團隊喺面對重大社會事件及複雜公共議題時，能以嚴謹角度、清晰敘事及具公信力嘅報道方式，為觀眾提供具深度、具資訊價值及具社會意義嘅新聞內容。
劇集及綜藝節目方面，TVB 同樣延續強勢內容表現。熱播劇集《新聞女王2》榮獲 「劇集組別優異獎」，突顯 TVB 喺劇本創作、角色塑造、戲劇節奏及話題營造方面嘅持續優勢；熱播真人騷戀綜《女神配對計劃》則獲得「綜藝節目組別優異獎」，反映 TVB 喺真人騷、戀愛綜藝及娛樂內容創新上嘅敏銳市場觸覺。由新聞專題、劇集到綜藝節目全面開花，足證 TVB 能夠於唔同內容類型及觀眾層面持續製造話題、創造收視熱度，並以高質素製作贏得國際業界認同。
電視廣播有限公司（TVB）一直致力為本地及海外觀眾提供高質素華語電視娛樂及資訊內容。作為領先全球嘅華語電視媒體之一，TVB 多年來憑藉優質製作、創新內容、專業團隊及國際視野，持續獲得世界各地觀眾、客戶、媒體及業界肯定。未來，TVB 將繼續推動內容創新、影像美學升級及數碼製作轉型，結合創意人才與 AI 科技優勢，為觀眾帶來更多具質感、具話題性及具國際競爭力嘅精彩作品。