沈卓盈於2019年嫁畀家族經營內衣生意嘅富二代老公杜灝標，兩年後更誕下囝囝Jayden後，就過住幸福少奶生活。上月5號啱啱度過44歲生日嘅沈卓盈，生日慶祝活動一浪接一浪，先有老公同囝囝同佢食生日大餐，之後又有好姐妹徐菁遙（原名徐淑敏）、陳自瑤等為佢安排生日驚喜。
沈卓盈日前PO返一眾好姐妹為佢炮製嘅生日驚喜短片同相到社交平台，先係Suki帶佢去嘆法國頂級美妝品牌嘅Spa好好放鬆一下，而夜晚Suki就再同埋陳自瑤及兩位好友，一齊去到位於中環、今年獲評為米芝蓮二星嘅法國餐廳，與沈卓盈食生日飯慶祝。
呢間佢哋揀嘅呢間法國菜大有來頭，餐廳由全球獲得最多米芝蓮星的女廚神 Anne-Sophie Pic 掛帥，而呢晚佢哋仲食咗唔少名菜同魚子醬，難怪沈卓盈喺帖文中指呢個生日福利Double up，佢又感謝幾位好姐妹每年都會提早為佢慶祝生日，同時佢亦許願：「希望到我哋七老八十嘅時候，還能穿上高踭鞋，一起慶祝生日，繼續給我唱生日歌🎶⋯嘻嘻」。
