任賢齊巡迴演唱會於年頭開跑，先後征服上海，泉州、大同及汕頭，剛完成汕頭站一連三場演出，小齊表演潮汕非遺「英歌舞」，喺頭兩場感冒嘅情況下，靠驚人意志力撐足全場，專業精神獲網民激讚「超級鐵人」，而點唱環節更爆出「韭菜粿」笑料，令全場笑到彎腰。
小齊喺汕頭站之前，先為電影飛去北京開會，又專程去鳥巢支持好兄弟五月天嘅巡演尾場。一向鬼馬嘅小齊先拍片笑稱要為五月天扮恐龍演出，而五月天主音阿信見小齊即時驚喜攬實，更感性表示每次重要時刻，小齊哥一定出現佢哋身邊。
小齊與阿信衣著品味驚人地相似，原來小齊訂購咗件舞台戰衣，去北京先發現同阿信穿嗰件係同款。小齊拍影片時拎住新衫，無奈笑言：「我連招牌也未撕呢！天啊，我們已經撞衫幾次，有一次是撞皮衣。」小齊覺得撞衫唔可怕，撞埋一齊先係兄弟，「撞個滿懷才是緣分」，此番話溫暖感動到無數歌迷。
北京站後，小齊順道去蒙古呼和浩特，笑言睇完五月天演唱會「有點失落，要去放鬆一下」，查實佢係為7月嘅呼和浩特演唱會作準備，更刻意訂製蒙古服裝，喺美麗草原休息兩日，隨即馬不停蹄飛去汕頭。
小齊自2019年開始巡迴，演出快近二百場。小齊每去一個地方就結合當地文化，被盛讚「接地氣」，成為各城市文旅爭相邀請嘅對象，今次佢喺汕頭站特別邀請潮汕著名嘅英歌舞青年團同台演出，為此更秘密練兵三個月。
汕頭演唱會點唱環節成為另一焦點，有觀眾突然大叫「小齊哥，食韭菜粿」，原來內地近期熱播電影《給阿嬤的情書》中，韭菜粿被戲稱有壯陽之效。小齊聞言先係一愣，隨即忍笑反問：「你們覺得我需要嗎？嘿！」全場觀眾齊聲爆笑回應：「需要！」小齊扮作無奈攤手，場面搞笑，而 有份參演該戲嘅演員蔡嘉偉專程去後台探班，仲帶上幾盒韭菜粿送畀小齊，小齊收到時哈哈大笑。
