「IdG偶像女生」育成計劃轉眼已經啟動一周年，企劃更已打造兩隊人氣女團IdG Bubbles 同 IdG Sundae 出道。其中IdG Bubbles出道短短半年，更已於各大頒獎禮獲頒唔同組合獎項，成績令佢哋非常鼓舞。
一周年慶典星期日於一個大型商場舉行，23名一期生總動員，聯同早前廣邀全港中學生參與，剛剛加盟嘅21名「IdG合唱團」成員首度亮相，其中最年輕成員係一名年僅12歲嘅小六同學，一齊見証同慶祝首個周年慶祝活動。
活動一開始由一期生Una打碟揭開序幕，繼而全體一期生陸續出場，同觀眾分享過去一年出道同訓練感受，之後就由首度亮相由嘅「IdG合唱團」與公眾見面同演唱。
及後，多位一期生先後演出，而已出道嘅IdG Bubbles同IdG Sundae亦現場唱跳 《春季再遇》同《新新地》等歌曲。IdG Bubbles仲帶同樂壇獎座與觀眾一齊慶祝，分享感言時更感動淚崩：「我哋係好開心嘅，不過一個團體入面背負住嘅嘢，可能比大家想像中多。因為我哋要承受得起『偶像女生』呢個名，所有女仔都好叻，唔單止係IdG Bubbles，所有成員，包括： IdG Sundae、練習生、同IdG合唱團，每個都真係好叻，希望大家可以多啲支持，咁我哋先可以行更遠嘅路。仲記得一年前嘅發佈會，都冇而家呢度一半嘅人，希望嚟緊可以幾倍幾倍咁多落去！」
之後IdG Bubbles聯同IdG合唱團同一期生，總動員首度唱出與 周耀輝 首次合作嘅新作品《一生會講幾多次再見》。活動接近尾聲時，總製作人亞拔宣佈，「IdG偶像女生」二期生招募6月1日就展開，今次招募更將參加者年齡降至13歲至25歲。之後再隆重宣布7月4號下午會於西九舉行「偶像女生IdG The 1st」首個大型專屬音樂會，成為一周年慶典重點活動。
