探討兩性關係嘅新節目《夫妻肺片》6月1號晚上十點半就會喺翡翠台播出，四位主持蕭正楠、曹永廉、車婉婉同吳若希喺節目探討夫妻間各種辛辣話題。Jinny話主持呢個節目簡直係開心到不得了，因為佢終於可以用人妻身份瘋狂對男嘉賓冇禮貌。因為有啲男嘉賓可能係自己前輩，做嘢嘅時候要有禮貌，但喺節目上終於可以「放肆」一下。
每集節目邀請唔同嘉賓探討夫妻相處之道，當中馬國明對夫妻間嘅理財規劃，就被Jinny同婉婉當成新嘅馭夫目標。Jinny就話錢係應該要好似馬明咁用，一定經老婆手先，呢個舉動無論咩層面嚟睇都係最適合，咁就會覺得錢係點都用唔完。婉婉就話叫咗節目組將馬明呢段剪出嚟俾佢收藏，佢要翻譯做英文字幕俾老公睇，等老公可以向馬明學習。
阿蕭就話節目可以刷新大家對愛妻嘅認知，因為阿廉係將成份糧全部上繳俾太太，呢個舉動好容易會令阿廉成為「公敵」。阿廉反指阿蕭好舒服，可以有財富自由，鍾意俾幾多都得。阿蕭解釋因為佢同老婆唔係好用錢，因為目前用嘅錢都係擺落BB度。
阿廉、阿蕭、馬明開演唱會大受歡迎，阿廉讚馬明對一切無咩所謂，而且相當勤力。阿蕭預告三子喺下半年仲計劃會去更多城市開騷，希望令更多人認識到佢哋。有囝萬事足嘅阿蕭其實好想帶埋囝囝蕭哈哈同行，不過宜家未係時候，佢都好羨慕方力申早前開紅館騷時可以帶埋囡囡一齊。
