楊千嬅開騷前挑戰體能特訓 感恩歌迷陪伴走過重要時刻

楊千嬅兩場喺深圳演唱會圓滿落幕！千嬅喺開Show前夕被老公丁子高逼住挑戰Hyrox特訓，有老公呢位魔鬼教練親自監場同鞭策，千嬅都唔敢偷懶。千嬅做完Training，成個人攰到散，工作人員即幫佢四手按摩鬆一鬆。

有老公做幕後軍師，千嬅上到台亦狀態大勇、火力全開，唱出多首經典歌曲，包括《烈女》、《楊千嬅》、《少女的祈禱》、《小星星》，瞬間炒熱全場氣氛。千嬅更向歌迷表白，指自己可以繼續用音樂分享人生，係最快樂嘅事，亦好感恩，感謝所有歌迷陪自己一齊度過每個重要演出。