演員喺拍戲期間朝夕相處，啱傾啱玩就自然建立出友誼，黃宗澤（Bosco）之前完成邵氏新劇《風華背後》，跟住就帶住劇中「龔家」兩個表姐弟蘇麗珊（Cecilia）與涂毓麟（Oscar）出發，佢哋前往大西北玩兼拍攝網上旅遊節目，出現之處均引起哄動被包圍難以拍攝。
此行三人去甘肅與青海延線玩足6日5夜，每日用好長車程去唔同景點，行程雖然較為勞累，曾試過為趕行程喺巴士上食午餐，似足學生去旅行咁，但各人完全無怨言，仲自得其樂，Bosco之前去過青海及西寧等地方，但今次有唔同體驗：「因為上一次純粹拍一啲比較教育型節目，今次係真係 for fun，全部係教人點樣去旅行、去打卡，或者搵一啲新奇刺激嘅玩意，所以今次真係幾特別、幾好玩。」
Bosco今次只係帶《風華》嘅Ceci同Oscar去旅行，問佢怕唔怕蔡少芬、朱茵、林愷鈴等詐型話佢偏心，Bosco解釋第一次提議係《風華》一家人一齊去，但第一次拍又唔敢驚動大家，所以佢哋先去玩，順便試吓個流程，如果下一次再去其他地方，再睇吓邊個得閒就嚟。
Bosco與兩人喺沙漠上跳舞玩得好開心，被問同兩個年輕人一齊去旅行感覺如何，Bosco立即抗議：「我都好年輕呀，雖然我係佢哋嘅前輩係事實，但我哋三個都打成一片，只係有需要照顧佢哋嘅時候，我必須挺身而出，所以冇分咩前輩，（一齊玩有冇代溝?）我覺得玩得最瘋狂嗰個係我呀！」 Bosco此行每次出現喺遊客區均吸引好多人圍觀，連去廁所都有上百人包圍佢，但Bosco全程笑容滿面，仲同圍觀嘅人開玩笑，難怪佢多年嚟一直收穫唔少粉絲。
Bosco到訪遊客區遇到一啲馬來西亞遊客，得知佢哋等咗自己個幾鐘，話只係想影一張相，Bosco盡量配合，喺唔影響到保安嘅負擔，影到就影，最重要係安全第一，「你知道影一張有時候，就一發不可收拾，咁你搞到保安工作量提高就唔好啦！」可見Bosco能設身處地為他人着想，難怪Bosco深受大眾喜愛。
《風華》將來播出如果收視好嘅話，問到Bosco會否帶台前幕後去旅行慶祝，Bosco聞言即講：「多謝樂小姐！當然如果套劇收得，唔好剩係慶功宴咁簡單，整個短旅行，有錢賺就攞啲出嚟請我地去旅行，順便拍埋節目，有收益、又可以慰勞員工，係唔係一舉兩得呢？」
今次有幸成為「波總旅行團」其中一員，Ceci心情十分興奮，讚前輩Bosco好照顧佢哋同工作人員，Ceci印象最深刻嘅係大家好有「團魂」，因為大家差唔多係廿四小時喺埋一齊，瞓覺時間唔多、車程時間好多，但大家冇呻過一句辛苦，Bosco仲間中睇大家有咩需要添！
至於，Oscar同前輩Bosco之前拍《執法者們》及《風華》時已相處過，今次感覺似一家人，期間Oscar湊太空人熱，喺青海沙漠以太空人裝扮示人，Oscar解釋：「扮太空人係拍緊波總做導演嘅微電影，但我覺得好似係懲罰我多啲，因為波導第一句就係你瞓低，佢仲扮怪獸襲擊我，但真係好好玩，之前我未嚟過大西北，好多景點都好靚。」
