林俊傑unfollow大嫂兼刪除合照 疑似為女友七七出頭導致家庭失和

金曲歌王林俊傑出道多年首度大方認愛，同細過佢20歲嘅美籍華裔女友網紅七七密運中，仲帶埋阿媽飛到美國參加女友嘅畢業禮，原本係一件開心事，竟然意外演變成家庭失和事件，瞬間由純愛偶像劇變成宮鬥劇。

事關有網友發現，近日JJ突然刪除社交平台上同阿哥阿嫂嘅合照，仲unfollow阿嫂，據傳事件導火線係JJ阿嫂被指策劃「黑料事件」，佢聯同閨密冒充七七嘅同學喺網上散布謠言，指七七係假名媛，刻意營造白富美人設，但事實上經常問同學借錢，又話佢私生活混亂，爆料內容殺傷力極大，意圖破壞JJ嘅新戀情。網友發揮鍵盤柯南嘅精神，分析JJ阿嫂嘅動機，應該係擔心JJ如果結婚生小朋友，會同自己嘅子女爭家產。

有台灣媒體訪問JJ媽咪家庭失和是否屬實，林媽媽表示大仔同新抱平時唔會干涉JJ嘅生活，一家人好低調，希望謠言止於智者，唔好挑撥佢哋一家人嘅感情。問到佢係咪鍾意七七，林媽媽就話唔會理年輕人嘅事，並冇正面回應。

而JJ經理人就表示，七七對於網上謠言已交由律師團隊以司法處理，公司不方便做任何回應。至於JJ為何取消關注並刪除同阿哥阿嫂嘅合照，經理人就未有回應。