TVB新節目《夫妻肺片》探討兩性關係，將於6月1號晚上10點半喺翡翠台播出，作為主持之一嘅吳若希（Jinny），喺節目探討夫妻間各種話題，吳若希近日接受網上節目《緬甸堂》訪問，坦言喺娛樂圈光鮮背後，承受巨大輿論壓力及情感消耗，一度陷入迷失嘅低潮期，自覺精神狀態亮起紅燈，患上情緒病，卸下防備，坦承自己並非外表般刀槍不入。
吳若希毫無保留喺節目透露一開始係收集幾個追求者嘅八字，用「風水八字」揀老公，要一個孝順同愛佢嘅人，可惜婚後生活並非童話故事，二人曾經歷漫長磨合期，直言兩人曾長時間處於想離婚崩潰邊緣。吳若希談到與老公Alex結合，過程既具戲劇性又帶點非理性，以「八字定姻緣」，吳若希有感當時喺感情路上有啲迷惘，靠「風水八字」去批算，最後「揀中」Alex，認為對方係命中注定嘅伴侶，因二人結合進展神速，佢坦言喺「衝動」狀態下懷孕且成為媽媽，迎嚟人生角色嘅轉變。
吳若希自認 「辣妻」性格與現實生活嘅瑣事時有碰撞，令夫妻關係一度極度緊張， 每次面對婚姻不協調，讓佢感到心力交瘁，離婚念頭曾無數次於腦海中浮現。
而呢段婚姻最終冇走向破裂，反而靠婚姻奇招「網絡公審」與「30日離婚 Challenge」成功逆轉局勢，成為兩人拯救婚姻嘅另類方舟。吳若希過去曾多次公開喺社交平台發文公審老公惡行，佢解釋呢啲看似瘋狂嘅舉動，其實係佢當時宣洩不滿、逼使雙方面對問題。
吳若希坦言為咗給予彼此最後一次機會，曾實行一個「30日離婚挑戰」，重新審視對方嘅存在價值，成功挽救婚姻，赤裸裸剖白展現最真實嘅婚姻自救方法，包括從「放大缺點」到欣賞及包容、重拾生活儀式感與溝通、接納完美婚姻並不存在。
