鄭秀文為宣傳「華星」唱片55周年嘅專訪繼續於網上公開，下月將於啟德展開3場演出嘅Sammi，將同時推出「Sammi 初」黑膠唱片，收錄多首經典作品。
Sammi出道初期嘅「華星」年代，由1990年首張專輯《sammi》、《Holiday》、《Never too late》、《鄭秀文的快樂迷宮》、《十誡》和《其後》，對佢最深刻係1993年推出嘅第四張大碟《鄭秀文的快樂迷宫》。
Sammi認為此作告別少女味，歌路與形象大改革：「開始搵到想行嘅路，當時未決定走跳舞歌手路線，聞到一種屬於自己嘅氣味。」自言並非抒情系歌手嘅佢，因《Chotto等等》成為開拓跳唱路線轉捩點。原來呢首經典歌更係她親自搵嚟。
Sammi話：「當時去日本旅行，喺一間嘅片舖聽到呢首歌，好鍾意，即刻買碟返嚟問唱片公司可唔可以翻唱？加上形象上革新，想試吓做跳舞歌手。」緊接推出快歌《叮噹》，令Sammi成功跳脫出道初期清純玉女嘅框架。
不過相比跳唱，Sammi本人更鍾愛加入藝術元素嘅演繹方式，例如2019年「FOLLOW Mi 演唱會」演繹《裸體早餐》，以及去年「拉濶音樂會」中演繹嘅《浮雕》，佢提到：「舞台上嘅爆發力、完全忘我投入，都係真實嘅我。其實我最鍾意較藝術感嘅作品，呢個係必經之路，依家我好有信心將呢啲放喺舞台，放大嚟做。加上觀眾鑑賞能力高咗，一開YouTube 已經睇到好多嘢，接受能力高咗好多。尤其我嘅觀眾，知道我慢慢做緊呢類作品，嚟緊我會做更藝術成份高嘅作品。」
Sammi一直以來不斷追求新鮮感，1994年推出《十誡》震撼整個樂壇：「首歌嘅議題，確實喺當年好大膽，歌曲裏面有呻吟聲、吔吔聲，嗰陣時嚟講好勁。多謝唱片公司畀我嘗試咁闊嘅嘢，肯定我嘅可塑性。」
同樣收錄喺黑膠「Sammi 初」side B嘅《衝動點唱》，當年同時推出慢版《唯獨你是不可取替》，Sammi笑言：「當時我推出快版先，因為好好聽另出首慢版，係安仔（許志安）嘅，但唱唱吓人哋以為首歌係我嘅。」
而另一首經典作品《Friends》由CY Kong包辦曲詞，Sammi讚嘆CY創意前衛：「30年前首歌有段讀白，仲要係英文，當時我收到份詞：『嘩，點解首歌咁有型嘅？畀我架？』我覺得自己好幸運，當年我咁細年紀有個咁叻嘅音樂人，寫咗首走得咁前嘅作品畀我，依家聽都唔過時。」
Sammi對「華星」年代最深刻係當年老闆James Leung、高層李進與湯正川等提攜，更原來英文名「Sammi」係湯正川傑作說：「我出道前喺中學叫Twing，個名好女仔，越嚟越唔似自己，想男仔啲感覺，Sammi呢個名係同湯正川先生一齊諗。」Sammi指當年歌手一腳踢，未流行形象團隊協助：「搵衫、買衫、打歌服、舞台衫，自己一個人做晒，真係好沉重，好辛苦但我又好鍾意，好彩後生，依家應付唔到！後來公司有資源請團隊，諗到就有人幫手，有時佢哋比我諗到更好。由『華星』到依家『寰亞唱片』，我都好好彩身邊遇到每個團隊都好幫到我。」
如果Sammi重返16歲，又會唔會再參加「新秀歌唱大賽」呢？Sammi毫不猶豫指一定會參加，因為追夢唔在乎時間同年齡，最重要心中有團火，佢話：「我爸爸好鍾意寫書法，佢70幾歲先至開第一個書法展，好小型，但我好感動，唔係做到幾成功、幾大型，而係『做咗』嘅開心。」