香港一代戲劇巨擘；門生眾多嘅「King Sir」 鍾景輝 博士今晨離世，享年89歲。King Sir姪兒鍾志權侄向傳媒發佈消息：
各位 King Sir 的學生及好友：
我是 King Sir 的姪兒。懷著沉痛的心情向大家宣佈，我伯父鍾景輝（King Sir）已於今早在家中睡夢中安詳離世。
伯父一生奉獻戲劇，桃李滿門，我們深知大家對他的敬重與愛戴。感謝各位一直以來對他的關心與陪伴。
目前我們家屬正著手處理伯父的身後事。關於後續的喪禮及追思安排，待落實細節後，會再向大家公佈。
請大家節哀順變。
家屬 鍾至權 敬上
香港演藝界中天王巨星或後輩新秀，對King Sir都肅然起敬。呢位德高望重嘅演藝界教父，以大半生編織香港影視與戲劇輝煌歷史，傳奇一生與演藝成就前無古人。
King Sir傳奇事蹟中，莫過佢對周潤發嘅知遇之恩，當年周潤發報考TVB藝員訓練班時，由於表現生澀，初期面試就幾乎被考官淘汰。唯獨擔任主考官嘅鍾景輝獨具慧眼，由其高大挺拔與身型加上獨特眼神，一眼睇出佢驚人潛力，於是力排眾議投下關鍵一票，將佢破格錄取，成就日後名震國際嘅華人演員。
鍾景輝 生於1937年，畢業於美國奧克拉荷瑪浸會大學，隨後取得頂尖名校耶魯大學戲劇學院藝術碩士學位。1960年代返港後King Sir將西方正統戲劇理論引入香港，曾任是無綫電視藝員訓練班開山祖師，更係香港演藝學院戲劇學院創院院長，一生作育英才桃李滿門，萬梓良、黃秋生、劉雅麗、蘇玉華、梁祖堯等實力派演員，全為佢得意門生。
King Sir於舞台劇、電視同電影領域都皆有極高成就，早年就首倡以廣東話演出西方荒誕劇同百老匯音樂劇，破紀錄八度榮獲香港舞台劇獎「最佳男主角」同四度獲得「最佳導演」，更獲頒香港藝術發展局「終身成就獎」。
多年來曾於TVB、麗的同亞視擔任高層行政工作，參與無數經典電視製作。晚年於《甜孫爺爺》、《高朋滿座》等劇集中飾演睿智長者，深入民心；2006年更獲頒TVB「萬千光輝演藝大獎」。亞視當年經典紀錄片《尋找他鄉的故事》，King Sir磁性旁白至今仍係港人集體回憶。
特區政府先後向King Sir頒授銅紫荊星章及銀紫荊星章，多間本地大學亦先後向佢頒授榮譽博士同院士榮銜，其履歷更被列入《中國大百科全書》及《世界名人錄》。