已故賭王 何鴻燊 同 梁安琪 嘅兒子何猷君Mario，日前與超模老婆奚夢瑤於法國補辦婚禮，Mario更履行當初「要將婚禮辦得特別好」嘅承諾，豪擲千金包下位於聖米歇爾山、建於8世紀嘅軍事與宗教建築聖米歇爾修道院（Le Mont St Michel）作婚禮場地。而喺兌現對老婆嘅承諾之餘，Mario亦不忘冧埋媽咪梁安琪，喺社交平台PO出媽媽嘅美照。
婚禮當日Mario就曬出多張同老婆喺聖米歇爾修道院內嘅行禮照，每一晚都如同postcard一樣相當唯美，而2號晚Mario再次上載婚禮照，不過今次嘅主角就變成媽媽梁安琪。平時霸氣十足嘅梁安琪，喺囝囝嘅鏡頭下變得活潑可愛，一時就抱住Mario個細女扮飛，一時就同Mario大仔Ronaldo玩龍珠合體，當然仲有梁安琪喺花費百萬打造嘅芍藥花海教堂內嘅起舞照，同擺出心型手勢遠距離與聖米歇爾修道院嘅合照啦！當Mario將照片PO到社交平台後，唔少網民都留言讚好，就連林建岳嘅囡囡林心兒亦留言讚梁安琪係「Cutest grandmaaaaa 💗💗」呀！
今次作為主禮場地嘅聖米歇爾修道院，係《魔戒三部曲：王者再臨》、《黑暗元素》等電影嘅取景地，而周杰倫亦曾以此景拍攝《倒影》MV及《最偉大的作品》專輯封面。