被尊稱為「King Sir」嘅一代戲劇大師 鍾景輝 今日（3日）傳出離世噩耗，享年89歲。呢位跨時代奉獻戲劇界更為業內作育英才嘅傳奇，令無數圈中後輩深表哀痛。
鍾景輝生於小康之家，一家人為泰國華僑，原籍廣東台山。自中學時代加入劇社就同戲劇結下不解之緣，隨後佢赴美深造，先後畢業於奧克拉荷瑪浸會大學同頂尖名校耶魯大學戲劇學院，更取得藝術碩士學位。
King Sir回港後於1971年向 TVB 提議開辦藝員訓練班並擔任導師，為本地影視圈注入大量新血。眾多門生中，最為人津津樂道嘅莫過於佢同「發哥」周潤發嘅師徒緣分。當年周潤發報考藝訓班時，因表現未如理想幾乎面臨淘汰命運，唯獨King Sir獨具慧眼，相中發哥高大外型與獨特潛質，力排眾議給予機會，關鍵的一步改寫周潤發一生，更為華語影壇締造一代巨星。
1980年代香港演藝學院成立，King Sir受聘擔任戲劇學院創院院長，執教鞭多年栽培出無數舞台同影視精英。佢曾透露教學生涯中最快樂的事，莫過於見證徒弟由「咖哩啡」一路成長，直到登台獲獎，滿足感勝過一切。
幕後培育以外，King Sir嘅獨特磁性聲線亦係一代港人集體回憶。曾為無數紀錄片配錄旁白外，其標誌性發音亦引來爭相模仿，當中以其得意弟子 王祖藍 模仿得最為神似，兩師徒過去更曾輪流一人一句錄製旁白，蔚為佳話。
King Sir演員生涯中縱橫舞台、電影與電視界，演活無數經典長者 同反派角色，包括 TVB 劇集《Loving You 我愛你2》、《甜孫爺爺》、《高朋滿座》等，演技精湛且收放自如。對戲劇卓越貢獻，亦令佢榮獲特區政府頒授銀紫荊星章，並於2006年獲 TVB頒發最高榮譽：「萬千光輝演藝大獎」。
2016年底King Sir不幸確診患有大腸癌，需入院接受手術。雖然術後康復進度理想，但由於體力大不如前，佢自2017年起減少幕前同舞台演出，逐漸退居幕後。《牛下女高音》亦成為佢電視幕前告別之作。
King Sir一生對戲劇熱誠始終如一，唔止改寫香港戲劇發展史，更啟發幾代演藝人。