薛家燕、黃劍文、張與辰、姚焯菲、黃博、羅逸軒、魔音女團、男團SURFIVE 等一眾藝人呢日現身《萬眾同心公益金》記招。家燕姐呢次會同Kimman演音樂劇，所以佢好努力練歌，仲自爆早前被地氈撠親不慎仆倒，搞到個鼻瘀咗，更一度擔心會影響演出，好在而家已經結焦好返，不過就仲有少少疤痕！
張與辰 呢次會有兩個表演環節，其中一連係會唱連串廣東歌，仲會有一班小朋友現身跳舞添！至於 羅逸軒 就會同Chantel、阿博合作，一展琴技演奏二人嘅歌曲，佢仲會同阿博合唱添！
Chantel呢次放暑假返到香港，佢就話會留到八月底先走。講到大學生活，佢就話識咗唔少朋友！Chantel更大方分享佢同李克勤大仔嘅友誼，形容彼此會互相分享心事，好開心可以識到對方，佢仲讚對方對電影好有熱誠，會係未來電影界嘅棟樑。
魔音女團 終極成團6人將會喺公益金呢個慈善表演嘅舞台作出道首演，佢哋透露當晚會以新造型同大家見面，仲會唱張與辰炮製嘅新歌，所以喺呢段時間都好努力排練。
