《中年好聲音4》今個星期日會上演安歌之夜，喺一眾選手未出戰前，觀眾已經大飽眼福，因為主持車婉婉StephanieChe首度喺中聲舞台夥拍嘉賓評審許志安AndyHui合唱昔日經典歌《會過去的》，令全廠人好似睇騷一樣咁興奮。
婉婉同安仔好耐冇喺電視螢光幕上合唱呢首歌，令佢哋既開心又勾起好多回憶，安仔話唔敢想像幾時再有機會唱。今次安仔擔任中聲嘉賓評審，被現場氣氛感染，體會到參賽者嘅緊張心情，又分享佢嘅評分準則，會喺選手演出期間放低所有觀念，投入舞台睇吓有咩吸引到佢，咁先對佢哋最公平。
呢晚安歌之夜，14位參賽者分上下半場演唱安仔90年代至千禧年代嘅經典歌曲，個個都話安仔嘅歌雖然大家耳熟能詳，睇起嚟好似好容易唱，實際演繹時其實好有難度，尤其係對幾位女選手，要女唱男聲加上要衝破語言障外，令佢哋感到特別大挑戰，許雲妮仲緊張到唔敢正視安仔，演出時仲有啲失準，而蔡宓婕為咗投放情感，幾乎大部分時間都係閉上眼晴演出。
