《2026香港小姐競選》今日舉行第二輪面試，參加者除咗一如以往同傳媒代表初步見面次外，今年更加係破天荒港姐創辦以來，首次現場直播面試實況，揭開多年未為人知嘅神秘面紗，47位女士分批換上泳裝，接受 樂易玲 等港姐統籌委員會成員嘅面試。
眾女士於早上便抵達電視城，大部份人都盛裝打扮現身，面對現場嘅大批傳媒亦對答如流，當中今年27歲嘅墨爾本註冊社工陳雨薇，就展現出高度自信，佢指參選港姐係想挑戰社會對美嘅定義，而喺佢嘅角度，佢認為每個人都可以係靚嘅。
而今次47位女士中，亦不乏有選美經驗嘅，包括上年曾經參選港姐嘅準博士生譚可兒，首輪面試以紅髮示人嘅佢，順應民意將頭髮染黑。而曾得到多倫多華裔小姐友誼小姐嘅莫嘉盈，面對傳媒嘅提問就以高EQ回應。
首輪被封為大熱嘅27歲嘅湯嘉琳、神似薛凱琪嘅吳倬希、與張寶兒撞樣嘅李澤欣，第二輪面試亦見到佢哋出現，對於被封大熱，李澤欣就話受寵若驚，仲話多謝大家嘅喜愛與支持。而獲何國鉦提名嘅林穎彤，呢日就着上對方贊助嘅戰衣到場。
