自《愛‧回家之開心速遞》開心宣布即將迎嚟結局篇，全城焦點落喺《愛‧回家》熊家、龍家及各大重點CP嘅最終發展之餘，亦十分期待接棒處境劇嘅內容及主角人選！ 今日（11號）TVB宣布全新處境劇《愛‧回家之三代同糖》（下文簡稱《三代同糖》）於8月隆重登場，播映時間為周一至五晚上八點翡翠台。
《三代同糖》由羅永賢Marco監製，馬俊縈編審，馬俊縈、謝浩洋、潘逸豪執行監製，三位主角均為唱得兼Talk得嘅女藝人，分別係《夫妻肺片 》車婉婉、吳若希及近期憑主持遊戲綜藝節目《唱錢》人氣急升嘅甜美女新人李茵彤Desta。 《三代同糖》係一部關於「女性覺醒」、「世代火花」及「AI 衝擊」嘅都市喜劇。
劇情講述投入大半生相夫教子嘅唐曹嘉冰（車婉婉飾）突然「覺醒」，並由加拿大飛返香港「進駐」女兒唐萬里／Lesley（吳若希飾）住所，決心找回失落嘅時光及初戀感覺…原來當年阿冰曾因 Lesley 做單親媽咪，堅持要生下女兒唐芯（李茵彤飾）徹底鬧僵，如今阿冰突然無預警殺入及擾亂Lesley生活，並與投契嘅外孫女唐芯聯手「夾攻」，令原本平靜嘅「唐家」掀起連番風雲……
同一時間，單親媽咪Lesley又喺工作上迎嚟極大危機，事業家庭同時告急，Lesley到底會點樣自處？ 為咗增加貼地感，《三代同糖》除以與觀眾／網民息息相關嘅「親情」及「世代溝通」（GENZ外孫女）作為故事主軸，仲加入「AI衝擊」、「重啟人生」及「時事」等賣點，傳遞歡樂、做人哲學，並會線上線下緊貼社會流行話題及網絡熱話，與觀眾／網民同頻感應時代脈搏，尋找情緒出口嘅共鳴感。
《三代同糖》主要角色選角相當用心，婉婉與Desta喺劇中將有合唱場面，兩代唱得之人同場較勁，為即將登場嘅全新處境劇點燃一大期待值，「所謂家人，係吵不散嘅依靠；所謂懂得，係知道何時放過自己亦放過別人；所謂人生係無論幾歲，都有活成自己喜歡模樣嘅勇氣」。
《三代同糖》係寫畀所有人嘅情書，有笑有淚、有刺有暖，道盡平凡日子裏最真實嘅動人滋味。 角色介紹：
唐曹嘉冰 - 叛逆追夢外婆（車婉婉飾） 活得豁達嘅樂天外婆，生於傳統潮州家庭，現在想追尋失落嘅夢想。熱愛家庭，聰明堅毅，有自己一套，但有時自尊心太強而顯得剛愎自用，想修補母女關係卻不知如何入手 ，「我心理年齡分分鐘後生過你」 。
唐萬里/Lesley - 職場鋼鐵中女（吳若希飾） 外剛內柔嘅倔強中女，體現未婚產子一事，此後為咗成為女兒支柱自立自強，面對女兒成長又有啲悵然若失。能擺平全港最棘手嘅公關危機，卻喺自家蝸居『三代戰場』兵敗如山倒，「業績KPI通通達標，點知屋企KPI全部撻Q」。
唐芯 - 佛系人間清醒（李茵彤飾） 古靈精怪佛系 GEN Z，於單親家庭長大，比同齡人心智更成熟，用最Chill姿態喺兩大魔頭（外婆+媽咪）之間優雅求存。跟所有少女一樣對萬物三分鐘熱度，憑著自身嘅冰雪聰明，周身刀張張利，「你越要我commit，我就越想quit」。