好多人都話廣東話係最難學嘅語言之一，想講好廣東話真係唔係咁容易。上星期《香港小姐競選2026》破天荒公開嘅第二輪面試中，就有唔少參加者因為廣東話唔正而鬧笑話，仲被評審要求要學好廣東話呀！
當中百萬網紅 溫思婷 嘅廣東話面試片段就最被網民熱議，雖然佢非常努力講值得讚揚，不過唔少觀眾都話如果唔上字幕，根本聽唔明佢講咩，大家一頭黑人問號。而香港出世、於美國長大嘅港產荷里活演員Jimmy O. Yang（歐陽萬成）亦有留意到，精通兩文三語嘅佢仲惡搞溫思婷嘅面試片！
myTV SUPER重溫面試情況
Jimmy喺片中嘗試扮對方嘅口音回答問題，模仿得維肖維妙，特別係扮對方講「蕃茄醬」同「牛腩麵」時，佢仲加埋聲調嘅手勢，令一眾網民都留低笑到標眼淚嘅emoji，其中包括何晉樂、Jessica蔡明思，而黃婉君Rosanne 則留言：「She is going to be famous bcos of you 😂😂😂」，前港姐雷莊兒亦留言叫Jimmy表演埋catwalk部分。相信各位參加者都要加緊練習學好廣東話先得喇。
Jimmy呢條惡搞片，身為主角嘅溫思婷亦有睇到，佢將影片轉發到去自己嘅喺限時動態，仲分享咗自己寫滿廣東話發音嘅筆記，表示自己正努學緊廣東話，仲留言：「怎麼那麼難學😭」。
