米雪 日前舉行咗兩場入行55年周年演唱會，喺圈中人緣非常好嘅佢，獲大批圈中朋友支持，好似有鄺美雲、羅霖、梅小青同老公、張文慈、何太梁安琪、尹光等等。米記亦請嚟好多老友上台合唱，包括黃日華、趙雅芝、石修、羅樂林，文雪兒、魏秋樺、白彪、劉雅麗、葉振棠、薛家燕、黎耀祥、羅家英、汪明荃、張與辰，仲有特登有加拿大返嚟嘅夏雨，咁多人嚟撐米記，真係好似開Party咁熱鬧呀﹗
唱咗《男兒當自強》嘅家英哥，話首歌真係好有難度，佢仲話除咗林子祥之外，只有佢可以唱到。問到佢哋有無打算開騷？家英哥就透露佢同阿姐有意喺四、五年內淡出幕前，至於會唔會去環遊世界？家英哥就話係一個好提議，但佢最想就係做兩件事，一就係學煮嘢食，二就係學做皮膚護理，佢仲話而家已開始幫阿姐做Facial添。
米記獨唱《每當變幻時》嗰陣，熒幕播出佢同已故男友尹志強嘅合照，雖然尹佬已離開16年，但米記依然情深不變，仲話尹佬喺天上望緊佢，等日後再同尹佬相聚。
已經70歲嘅米記，呢晚以銀色假髮，配上喱士裙同魚網絲袜大跳《APT.》，盡顯活力一面。
作為後輩嘅張與辰，原來未參加《中年好聲音3》已經喺馬來西亞同米記合作過，為咗支持米記，與辰連續兩晚都嚟做嘉賓，為咗比觀眾新鮮感，與辰仲分別唱咗《祝君好》以及呢首歌嘅韓文版。
