吳文忻 9號不敵癌魔離世，終年51歲。家人15號晚為佢舉行追思彌撒，丈夫 陳劍陵 同兩位女女、好友彭秀慧以及約50位公眾同教友出席。現場佈置簡潔，又見到文忻嘅遺照印喺一塊白色布上。
喺彌撒期間，陳劍陵更一度除低眼鏡拭淚，而兩名女兒就表現平靜。痛失好友嘅彭秀慧，最近亦忙於處理文忻後事安排，心情尚算平靜。彭秀慧受訪問時指，最重要係喺病者仍然生存時，盡量畀佢知道大家愛佢，而彭秀慧喺文忻身上學習到呢點，喺人臨終之前，盡量將想講嘅講出嚟，畀對方知道。
彭秀慧認為吳文忻無憾，因為對抗病魔唔容易，佢要做嘅都已經做晒，而臨走時係心情平安。至於會否牽掛兩個女，彭秀慧認為每位做媽媽嘅都會唔捨得，但係請大眾放心，因為佢哋嘅爸爸會照顧兩個女。
彭秀慧亦代文忻向外界澄清，文忻同丈夫陳劍陵並未簽紙離婚，亦無分居，佢哋仍然係家人身份，文忻丈夫一直盡力照顧家人。家人亦會喺24日為文忻舉行守靈彌撒，歡迎公眾參加，但就強調教堂空間有限，懇辭花牌，至於告別儀式就只限至親出席。
