梁洛施 日前現身上海電影節，更孖住內地導演男友 馬浴柯 恩愛現身紅地氈，非常Sweet！Isabella喺飛上海前就，先同台灣型男 楊祐寧 喺香港出席珠寶活動，佢透露自己有兩部作品參與上海電影節，而佢同劉青雲、彭于晏嘅新劇就會喺年底播出。
Isabella就話，同兩位演技一流嘅大型男合作好開心，三個人都擦出好好嘅火花。佢更形容青雲並唔嚴肅，反而似大細路，係一個好好嘅朋友同演員。
今個月23號係Isabella嘅38歲生日，佢話自己應該會喺工作中渡過，自己亦冇諗慶祝計劃，因為有兩套戲要上映，重心都係要放喺宣傳方面。被問三個仔會唔會送生日卡表心意，Isabella就話而家收少咗生日卡，如果唔係同囝囝一齊過，就會收到佢哋嘅電話。 祐寧有份入圍今屆台北電影獎角逐影帝獎項，佢話入圍當然開心，但攞唔攞獎就平常心，反而拍檔蔡思韵冇份入圍影后，佢就覺得好可惜！因為佢認為蔡思韵嘅肢體動作同演技都表現得好好，所以好遺憾佢成為遺珠。
