何晉樂 日前為新歌《My Only》舉行新歌發布會，呢次更係阿Rock相隔兩年再出歌，阿Rock同大家分享新歌嘅創作理念，佢覺得每個人心中都會有某啲人事物好似「唯一」一樣重要，想企喺歌迷角度去睇，大家平時點睇自己。亦希望大家知道佢哋對自己都好重要，阿Rock仲話，呢首歌嘅歌詞係諗住歌迷寫，係可以連結彼此間嘅經歷同關係。
至於監製Johnny Yim 以及聲夢一班戰友：鍾柔美、潘靜文、蔡愷穎、張馳豪、林智樂同埋擔任MV女主角嘅姚焯菲都有現身支持，齊齊睇MV。參演MV嘅Chantel，除咗向阿Rock送上一個Q版公仔之外，兩人亦即場上演MV中一段舞步。
除咗聲夢嘅兄弟姊妹拉大隊嚟支持之外，樂易玲以及處境劇《愛．回家之開心速遞》嘅樊亦敏、陳浚霆、湯盈盈亦都驚喜現身，同阿Rock預祝30歲生日。阿Rock就話，大家呃佢呃得好成功，因為活動前一日，佢就收到戲中媽咪樊亦敏嘅訊息表示有事要缺席活動，令佢都有少少失落，所以見到Amy出現都好開心。
雖然《開心速遞》好快就要完結，但阿Rock就話，佢會計劃開一個網上短片平台同Amy姐延續母子情，完成新歌宣傳期後就會有片俾大家睇。阿Rock仲話，希望大家可以睇到佢哋唔同嘅才華添！
