曾有「少男殺手」之稱嘅 黃依汶 自從2014年同 陳國坤 結婚後，2016年誕下囝囝陳真，之後就同老公一齊專心培養囝囝成能文能武嘅小朋友。雖然陳真只得10歲，但因為自幼習武，又遺傳爸爸嘅武術天分，仲曾經奪得劍擊比賽冠軍以及接受黃埔青少年軍校特訓，學習軍事知識同生活技能。
近日Emme喺社交平台分享一段陳真幫手做家務洗衫嘅片段，仲寫道：「姐姐放假，爸爸飛咗，咁邊個洗衫先？爸爸除咗玩，都教生活技巧嘅👍🏻Thx papa. Happy Father's Day❤️阿媽未掂過部洗衣機😂」，唔少人睇完都大讚陳真相當乖仔，亦覺得Emme教子有方，令囝囝年紀細細就可以獨當一面，成為一個有擔當嘅小鐵漢。
除此之外，Emme曾分享育兒心得，表示自己會睇好多育兒書同有道理嘅文章提醒自己。為咗培養囝囝有閱讀興趣，佢更喺屋企打造一個擺放各類圖書嘅「迷你圖書館」，閒時就會陪囝囝畫畫、野餐，享受親子時光。
