曾於《萬千星輝頒獎典禮2024》奪得「馬來西亞最喜愛TVB劇集」，並為 龔嘉欣 及 張曦雯 分別贏得「最佳女主角」及「馬來西亞最喜愛TVB女主角」嘅劇集《企業強人》，成為首部登陸內地衛視黃金檔嘅港劇，劇集將於本月24號起，每晚19:35於深圳衛視黃金劇場兩集連播。
日前國家廣電總局、深圳市文化廣電旅遊體育局、深圳廣播電影電視集團與及TVB代表，同劇集監製羅永賢及四大主演 陳豪 譚俊彥 龔嘉欣 及 張曦雯 就於深圳出席首播發布儀式。
《企業強人》嘅故事主要聚焦大灣區物流行業，劇集於深圳實景拍攝，前海、南山創業園、歡樂港灣摩天輪等標誌性地標盡數入鏡，展現出深圳科創之都、創業之城嘅特質。發佈會上四位主演分享拍攝經歷，陳豪指深圳前海畀佢好有活力、好壯觀嘅感覺；譚俊彥就指喺深圳拍戲非常方便，無論需要啲咩道具，於網上落單，十幾分鐘就可以送達。龔嘉欣則分享喺濱海大道騎電單車拍攝快遞員戲份嘅經歷；而張曦雯則對前海拍攝無人機項目嘅戲份記憶猶新。
《企業強人》已獲多項專業認可，當中張曦雯憑「宋翹」一角斬獲紐約電視電影節「女演員組別優異獎」、龔嘉欣憑「方芳」一角於TVB萬千星輝頒獎典禮上首封「最佳女主角」；同年劇組受邀參與第30屆上海電視節白玉蘭獎頒獎典禮。
喺國家廣播電視總局嘅指導與支援下，TVB攜手深圳廣播電影電視集團，從眾多佳作中精心遴選出《企業強人》。國家廣電總局國際司涉外管理處處長鄭庶指，廣電總局鼓勵港產嘅優秀節目於電視黃金時段播出，進一步豐富電視大屏內容，港劇《企業強人》率先亮相深圳衛視黃金檔，意義重大，同時期待呢部劇成為新嘅起點，帶動更多優秀港產節目走進內地觀眾視野。
而《企業強人》兩位好拍檔 陳豪 與 龔嘉欣 ，最近再次攜手合作，主持全新美食節目《美食強人》，聯手發掘大灣區嘅「強中之強」代表美食與實力小店。
