古天樂、錢嘉樂、導演唐季禮、林明禎、趙善恒、林耀聲、徐偉棟等，呢日現身由導演陳詠燊做策展人、張蚊任美術總監嘅展覽開幕酒會，並向8套經典電影致敬。Sunny感激身邊好多朋友支持，講到得到偶像許冠傑力撐時，都忍唔住露出小粉絲嘅興奮神情。
Sunny就話，多謝鄭丹瑞同蕭潮順幫手牽線，令佢住厚面皮問，可唔可以邀請阿Sam唱一首《最佳拍檔》呢？當收到回覆得知阿Sam同意時，Sunny都覺得好受寵若驚，仲同老婆一齊開住喇叭打開阿Sam條片。一聽到阿Sam話：「大家好，我係阿Sam。」時，自己已經感動到想喊，睇完成條片已經喊到停唔到。
久未露面嘅唐季禮，呢日亦談及當年同成龍大哥以及楊紫瓊合作嘅趣事。唐導就話，喺澳洲拍《警察故事4之簡單任務》時要同大哥學潛水，當潛完上船後忍唔住嘔，而大哥正好上水，食曬佢嘅嘔吐物，令大家笑到喊。
唐導又分享當年幫董瑋做副指導拍《中華戰士》時，董瑋就話要搵個最斯文嘅武師，幫Michelle著威也網。著著下，Michelle突然大叫：「你做乜搣我，做乜摸我籮柚？」嚇到唐導不斷話：「冇！」當時董瑋亦即刻衝入化妝間了解。點知Michelle突然哈哈大笑，表示自己只係見唐導好斯文，所以就想整蠱下佢，之後大家亦做咗朋友。
父親節啱啱過去，錢嘉樂就話自已過得好開心，得到期間限定嘅皇上待遇。至於講到處境劇《愛．回家之開心速遞》即將完結，太太湯盈盈有咩新計劃？嘉樂就話，盈盈都想繼續拍劇，不過亦好愛家庭，所以佢覺得一切可以適當地進行。
專程嚟支持Sunny嘅明禎，呢日即場恭喜啱啱喺拉斯維加斯完婚嘅恒仔，仲叫恒仔一定要請自己去飲，會大利是俾恒仔。恒仔就話，本來冇擺酒打算，但既然明禎話想飲，亦可以考慮下。明禎更提議，可以大家一齊食火鍋。