熱播劇《飛常日誌II》再出動宣傳，仲公佈收視達21.2點，成為今年首周最高收視劇集，難怪大家都無懼狂野艷陽再現身街頭宣傳喇。佢哋向圍觀嘅公派閃卡同紀念品，而 馬國明 同 劉穎鏇 仲不斷同大家Selfie自拍，非常親民。佢哋仲話對收視成績極有信心，認為之後會有更好成績呀。
Tiff上一輯嘅空姐裝已經令唔少觀眾心心眼，呢日以機師造型出現一樣型爆，就連馬明呢個有婦之夫都大讚Tiff襯晒入形入格。至於其中一幕獻吻食檸檬，馬明嘅天然呆驚到震一幕笑爆，呢日佢就指其實心中不知幾開心呀。
而 郭柏姸 呢日同 鍾柔美 齊齊以空姐造型亮相，劇中佢同 吳偉豪 嘅發展非常Sweet，佢就話希望有下一輯再同Ricco甜蜜發展喇。
至於Captain K 朱敏瀚 被觀眾指有力接棒早年嘅Cool魔，呢日朱仔就直認靚仔聽到悶，希望大家可以多留意佢搞笑幽默嘅表現咁話。而求愛失敗嘅 周嘉洛唱《男人最痛》笑到觀眾肚痛，呢日佢就指自己大有進步空間，而曾同嘉洛唱K嘅朱仔，就指中低音域最啱老友發揮喎。
《飛常日誌II》星期一至五晚 20:30 翡翠台