何晉樂 相隔兩年再推出新歌《My Only》，MV更由Chantel姚焯菲擔任女主角。阿Rock形容Chantel係女主角不二人選，因為各方面都好貼合小宅男追星嘅故事，更會令畫面變得可愛。Chantel知道要出演MV一開始都好驚喜，但亦感謝阿Rock俾機會自己，呢次拍攝體驗令佢覺得好似返到當年拍《青春本我》咁。
阿Rock同Chantel喺MV有唔少跳舞部分，而其中一段舞，更係Chantel自己歌曲《New Fantasy》嘅舞步。未埋位時Chantel仲好努力同阿Rock跳舞，又讚阿Rock學得快又跳得好。而阿Rock就笑言，MV中自己會由瞓覺幻想同Chantel共舞，所以唔只係跳Chantel嘅歌，仲會有唔同類型嘅舞蹈。佢仲話，有可能自己嘅跳舞類型歌曲係得呢首。
新歌由Johnny Yim負責作曲、編曲、監製，填詞部分就出自阿Rock本人手筆。阿Rock就話，呢首係送俾歌迷嘅一首歌，希望有活力同正能量送俾大家，而寫歌詞時都好有挑戰性，要寫開心回憶時要睇返歌迷寫嘅信去回顧點滴，最後先寫出呢首歌。
