現年51歲嘅楊采妮（Charlie），自2013年與新加坡籍男友邱韶智結婚，並育有一對雙胞胎兒子後，便定居新加坡，逐漸淡出幕前。過住幸福生活嘅Charlie，不時會喺社交平台分享生活點滴，早前佢就趁住兩個寶貝仔放假， 展開韓國之旅，不僅兌現咗同老公嘅浪漫約定，大曬一家四口嘅溫馨合照，仲喺當地同好姊妹許茹芸合體，嚟個短暫閨密之行！
楊采妮日前喺帖文中透露，以前因為電影宣傳、拍攝廣告或出席釜山電影節等而到訪韓國，但每次行程都相當匆忙。直到去年，佢同老公提出想好好探索電影節以外嘅釜山，於是佢哋撇低一對孖仔，兩口子重遊舊地，入住海邊酒店，愜意地乘搭當地核心觀光設施Blue Line 觀光列車，好好探索當地。二人世界雖然相當甜蜜，但Charlie仍不忘兩個寶貝囝囝，更許願指下次一定要帶佢哋嚟玩。
言出必行嘅 Charlie 趁住假期，終於兌現咗呢個承諾，佢同老公帶住一對孖仔重遊韓國，展開釜山與首爾嘅家族旅行。佢哋乘搭有名嘅松島海上纜車、天空膠囊列車，又去咗唔少主題樂園、公園同當地小店，Charlie沿途不忘記錄囝囝嘅背影同旅行點滴，仲搞笑咁話：「自從兩位寶貝降臨到我們生命裡，每個家庭旅行都有點像兒童節😂」
今次除咗係家庭之旅外，Charlie仲同定居喺韓國嘅「最美乾媽」許茹芸重聚！兩人喺出發前就相約於首爾嘅遊樂園見面，當時許茹芸神神秘秘咁話自己「不方便一起玩遊樂設施」，一個會令人產生誤會嘅理由，直到見面當日Charlie先知原來許茹芸偷偷準備咗驚喜小蛋糕為佢補祝5月嘅生日，所以先故意唔玩機動遊戲。
而為咗令老婆可以好好同閨密敘舊，邱韶智仲貼心咁主動提自己帶兩個仔去玩，難怪網民都大讚邱韶智係神隊友，超寵老婆啦！
