資深演員苗金鳳於6月25日在將軍澳醫院離世，田啟文代其兒子發布消息，未有透露離世原因。苗金鳳17歲入行，由演楚楚可憐嘅姑娘，到後來演霸氣長輩等角色，均精準拿捏演技，讓觀眾留下深刻印象。
苗金鳳17歲入行，拍第一套粵語片《雙鳳仇》一舉成名，後嚟粵語片式微，苗金鳳遂正式投身電視圈，參演過不少作品。苗金鳳1994年參演王心慰監製嘅劇集《第三類法庭》，劇中飾演女主角邵美琪母親韋金鈴，其霸氣形象一直深入民心。
苗金鳳於1995年加入TVB處境喜劇《真情》劇組，飾演黃德斌阿媽「越南婆」莫少芬，與關海山及黎萱有唔少對手戲，苗金鳳喺1998年拍TVB台慶劇《烈火雄心》，挑戰高難度角色，飾演精神分裂患者「范瑞燕」，喺劇中飾演李子雄母親，母子間對手戲，讓唔少觀眾動容，演技再獲好評。
苗金鳳曾於2005年後一度淡出娛樂圈，曾 移居馬來西亞，於2013年獲監製曾志偉及陳維冠邀請演出TVB重頭劇《女人俱樂部》，並喺劇中飾演野蠻奶奶「黃趙詠梅」與李若彤有多場針鋒相對嘅精彩對手戲。自從《女人俱樂部》後，有傳苗金鳳因「厭倦拍劇」為由再次退隱，於2015年參演舞台劇《杜老誌》外，鮮有公開露面。
