今個星期繼續由 王鎮泉Jeoffrey 為觀眾送上電影資訊，恐怖大師溫子仁最近搞作多多，首先就係佢先後招攬咗最近兩套刀仔鋸大樹嘅大熱電影《嚇房》同《Obsession》嘅導演Kane Parsons同Curry Barker，兩位都係網上非常高人氣嘅YouTuber，年紀輕輕只有27歲，但係已經做出好好嘅成績。
另外溫子仁之前已經講咗會為重啟嘅《鐵甲威龍》影集擔任監製，最近仲有消息指，佢會為第一季執導其中幾集，預計下年一月會喺溫哥華展開半年拍攝，今次會圍繞一個全新嘅機械戰警。
本周電影新片速遞
《反斗奇兵5》：一班玩具朋友面對「莉莉平板」（Lily Pad）如臨大敵，嚇到騰騰震，誓要同現今小朋友最沉迷嘅各式電子科技產品決一死戰，大家最熟悉嘅玩具朋友胡迪、巴斯光年、翠絲，將聯同新舊玩具對抗史上最強敵人。
《超女》：當一名手段殘暴嘅突發強敵逼近家園，超女被迫踏上一場橫跨星際嘅史詩旅程。喺呢段充滿未知同險阻嘅征途中，佢將會喺復仇嘅怒火同正義嘅初衷之間尋求平衡，誓要守護所愛之人。
《被偷走的勁歌》：過氣婚禮歌手力奇（保羅活德飾），喺某次演出意外結識星途停滯不前嘅男團成員丹尼（尼鍾尼斯飾）。兩位失意才子惺惺相惜，一拍即合，但當兩人分道揚鑣後，丹尼就偷偷將力奇未完成嘅歌曲改成大熱金曲，更藉此一躍成為超級巨星。事業、夢想、家庭、信任⋯一首被偷走嘅勁歌，如何改變段段人生？
《真的相識過》：由葉世榮和Beyond前經理人陳健添（Leslie） 共同監製，黃家駒首個紀錄片《真的相識過》，詳盡探討黃家駒成名前後，喺音樂路上嘅奮鬥同轉型，以至踏上事業巔峰，展現Beyond嘅珍貴現場演出片段同從未曝光嘅影像紀錄。
另外，近年有好多經典動畫再次推出電影版，好似最近有指《飛天小女警》同 《霹靂貓》，都會登上大銀幕，粉絲當然最開心。而動畫大師宮崎駿嘅名作《魔女宅急便》，亦都宣佈會第二次開拍真人版影集，不過之前係日本演員，今次就係由英國嘅演員演出，必定有另一番味道。
本周香港嘅票房龍虎榜，截至6月24號中午：第1位《給阿嬤的情書》、第2位《揭密日》、第3位《一個部門的誕生》。
