陳曉華、譚俊彥、梁凱晴、林秀怡、林淑敏、一眾專業人士及卓越業界精英，現身由TVB才駿軒打造，向觀眾提供預防健康風險嘅節目《掌握健康人生》以及提供最Update健康資訊嘅節目《重症解密》記招，氣氛熱鬧。
讀護理系出身嘅Hera，呢次為《掌握健康人生》擔任主持，佢話希望可以向觀眾展示專業一面，而佢亦透過節目接觸到好多專家以及了解到預防健康風險資訊同相關保險，好開心可以做到呢個節目嘅主持。
喺活動上，大小姐 林淑敏 以癌症康復者身分講述經歷，雖然已經病癒十幾年，但大小姐至今仍然難以忘記嗰份無助感。佢亦覺得今次嘅節目好好，可以用真實個案提醒觀眾，一切要及早做好防範治療。
至於秀怡就以照顧者身分講述照顧患上子宮頸癌嘅媽媽心路歷程，更忍唔住落淚。秀怡好開心可以作為照顧者分享，因為一講到癌症大家都會諗起點樣支援患者，但照顧者情緒都好重要。
Hera同朱敏瀚喺2024年被爆秘戀，雖然二人未認過拍拖只認過了解中，不過近日朱仔就喺活動表示自己單身咗一排，亦冇同Hera聯絡。呢日Hera回應傳聞，表示自己一直單身，一直自己一個人，係好獨立嘅女仔，亦以事業為重。Hera更自爆自己年初大病過一場，休養咗好耐一段時間，所以聽到大小姐同秀怡分享亦好大感觸，覺得身體健康最重要。
由阿Shaun帶隊，同Carina、Hera同秀怡主持嘅《重症解密》將會解開坊間種種健康迷思。阿Shaun更同Carina進入手術室睇咗一場微創手術，令Carina覺得大開眼界。
喺啱啱過去嘅父親節，阿Shaun都收到仔女親手畫既心意卡做禮物。而阿Shaun爸爸狄龍最近亦出山拍新戲，講到會唔會探班時，阿Shaun就話爸爸嘅戲份應該拍曬，又讚爸爸身體好，有工作更精神。至於有冇父子合作機會，佢就話爸爸好難請，可能要等未來仔女大個，再同爺爺合作。
