59歲鄧兆尊日前接受DJ顏聯武網上節目訪問，首次談及當年父母捲入爭產風波時，兆尊身為粵劇名伶新馬師曾鄧永祥長子，承受驚人重擔，並非外界眼裡享樂度日嘅「二世祖」。
兆尊受訪時表示當年家族爭產官司，引起全城轟動，父母對簿公堂，父親新馬師曾病重時，銀行戶口被凍結，家庭財務狀況陷入混亂，兆尊透露父親留醫近二百日，出院時須支付醫藥費高達1,900萬元，兆尊一力承擔起整個家庭開支，每日要撲20萬為一星期醫藥費找數，情緒幾乎崩潰嘅黑暗時刻。
兆尊與弟妹將三人名下各自持有嘅三層物業全數變賣套現，兆尊慶幸當時樓市有承接力，呢筆賣樓嘅救命錢足夠填補巨額賬單。兆尊喺嗰段最難捱嘅日子，要努力維持生計，繼續喺電視台日以繼夜咁拍劇，又要留意醫院隨時打嚟嘅電話，只要一收到醫院來電就係父親病情不穩，兆尊試過緊張到着住古裝戲服衝去醫院探望父親。當年家族爭產風波成為全港追訪嘅焦點，面對各種壓力下，兆尊出現嚴重「鬼剃頭」。
兆尊坦言呢段四處奔走籌錢嘅經歷，成為其人生中最寶貴嘅一課，令佢深刻體會到咩係「人走茶涼」、「人情冷暖」，兆尊話當一個人一直被視為「有錢仔」，突然家道中落，身邊人嘅態度係180度轉變，有啲人選擇退避三舍、有啲人會雪中送炭，有啲朋友喺佢最患難、最無助時，願意伸出援手給予信任，兆尊至今仍銘記於心。
