周吉佩推出新歌《單眼皮愛大眼睛》，作品由吉吉親自作曲同時兼任編曲及監製，MV邀請前港姐冠軍宋宛穎（Sabrina）飾演現實版嘅「大眼睛」，兩人喺MV演繹一對性格相反又非常甜蜜嘅熱戀情侶。
今次合作兩人有唔少親暱戲份，除咗攬攬、拖手，又會頭貼頭、面貼面，做出情侶日常甜蜜畫面，吉吉大讚Sabrina夠專業一秒入戲，大家好似真實情侶一樣，譬如扮錫落塊薯片度，大家要好近，但拍嘅時候又唔會好尷尬。吉吉亦好有風度，喺拍攝前一晚特意同Sabrina溝通，講解MV嘅氣氛同導演要求，加速二人投入角色。
至於點解會邀請Sabrina擔任MV女主角，吉吉話無論外型、真實性格，Sabrina都同構思角色不謀而合，Sabrina好貼切擁有一雙大眼睛，吉吉平日喺公司接觸到嘅Sabrina感覺比較文靜，原來佢都好熱情同幾玩得，比想像中跳脫，同MV角色完全吻合。
講到創作由來，吉吉話留意到香港情侶有個共通點，就是同另一半性格迥異，有時性格太相似會火星撞地球，反而一凹一凸性格互補不足，希望透過歌曲令大家更懂得欣賞自己嘅另一半。
此外，歌名中嘅單眼皮正正係吉吉嘅相貎，原來佢有從玄學角度去理解吓呢個特徵，指單眼皮係代表比較Cool同心思細密啲，係比較認真嘅人，而大眼睛就係感情豐富啲。
