《2026香港小姐競選》12位候選佳麗今日繼續展開湖南外景之旅，三位師姐馮盈盈、陳懿德同黃嘉雯亦隨隊同師妹打氣，馮盈盈笑稱自己一身打扮好似健身教練，陳懿德話佢哋主要為師妹提供情緒價值。
一眾佳麗繼之前以泳裝上陣騷身材，之後穿上傳統特色旗袍展現東方女性魅力，令觀眾見到宜古宜今嘅佳麗。嚟到外景拍攝第四日，12位佳麗同團隊先後趕赴不同景點，包括湄江國家地質公園、仙人洞等，12位靚女改以運動Top，襯上熱褲騷出小蠻腰，加上背景呈現長長嘅瀑布水柱，散發出一股青春少女氣息。
1號袁絲珩Bernice 、4號譚雅文Tiffany 、5號魏欣 Etherine表示今次外景令佢哋見識好多靚景，覺得眼前景點好壯觀，大家都互相把握時間影咗好多相留念。
2號李澤欣Scarlett、3號李澄晴Chorie、6號盧蔚晴Jasmine同樣喺旅程中大開眼界，三位覺得自己平日去旅行好少到呢類地方，大讚景觀優美。另外六位佳麗7號楊媛媛Vera、8號鄧匡閔Ada、9號周芳姿Gracia、10號陳梓穎Cecilia、11號顏懿菲Agnes、12號湯家琳Caris面對眼前嘅美景，佢哋顯得心情非常興奮。